Մուտքագրել որոնվող բառը(երը)
ՊԱՇՏՈՆԱԿԱՆ

2019թ. շուրջ 1000 երեխա ավելի կհաճախի մանկապարտեզ. հերթագրման խնդիրը կլուծվի փուլային եղանակով

13:30 27 Դեկ 2018
Դիտումներ 803
2019թ. շուրջ 1000 երեխա ավելի կհաճախի մանկապարտեզ. հերթագրման խնդիրը կլուծվի փուլային եղանակով

Երևանի քաղաքապետի տեղակալ Տիգրան Վիրաբյանը մանրամասնել է նախակրթարաններում հերթագրումները նվազեցնելու նպատակով 2019 թվականին Երևանի քաղաքապետարանի նախաձեռնած ծրագիրը, դրա իրագործման ընթացքը և սպասվող արդյունքները:

«Մեր քաղաքի բնակիչների համար սա երևի ամենասպասված լուրերից է, որովհետև, նախակրթարաններում հերթագրվածների թիվը 8 հազար է: Կան նախակրթարաններ, որոնց հերթագրումները հասնում են հարյուրների: Երևանի քաղաքապետի առաջնային հանձնարարականներից էր՝ գտնել ճանապարհներ, որ կարողանանք փուլային տարբերակով բացել նոր խմբասենյակներ: Իհարկե, այդ ճանապարհը բարդ է, որովհետև, ցավոք, մեր նախակրթարաններում մի շարք տարածքներ իրավական կամ առանց իրավական հիմքերի տրամադրված են տարբեր կազմակերպությունների: Եվ մեր առաջին աշխատանքներից էր գույքագրել, թե նախակրթարանների տարածքներից որքա՞նն է զբաղեցված և ի՞նչ նպատակով է օգտագործվում:
Այժմ սկսվել է մեծ գործընթաց. նախակրթարանները բեռնաթափել այն բոլոր կազմակերպություններից, որոնք առանց իրավական հիմքի գործում են նախակրթարաններում: Ցավոք սրտի, շատերը դժվարություններ են ստեղծում, սակայն օրենքի ուժով խնդրին կարողանում ենք լուծում տալ:

Ծրագրի առաջին պտուղները կքաղենք արդեն փետրվար ամսին, երբ մի շարք վարչական շրջանների նախակրթարաններում նոր խմբեր կբացվեն: Սա 2019-ի մեր առաջնային խնդիրներից մեկն է, որովհետև պետք է կարողանանք շուրջ 1000 երեխայի համար ստեղծել նոր խմբեր:

Ծրագրի փուլերի մասին


«Ծրագիրը կընթանա 3 փուլով: Առաջինը կմեկնարկի փետրվարին՝ Արաբկիր, Աջափնյակ, Ավան, Դավթաշեն, Էրեբունի, Կենտրոն, Մալաթիա-Սեբաստիա և Նոր Նորք վարչական շրջաններում: Երկրորդ փուլը կլինի մայիսին, երրորդ փուլը՝ սեպտեմբերին:
Նշեմ, որ ընտրված են այն վարչական շրջանները, որտեղ ունենք ավելի շատ հերթագրված երեխաներ, նաև այն վարչական շրջանները, որտեղ այս ամիսների ընթացքում հնարավորություն ենք ունեցել ստեղծելու համապատասխան տարածքներ: Հավելեմ նաև, որ առաջին փուլի համար ընտրվել են այն տարածքները, որոնք չունեին վերանորոգման կարիք կամ ունեին մասնակի՝ կոսմետիկ վերանորոգման կարիք, որոնցում աշխատանքներն այժմ տարվում են: Ի ուրախություն մեզ, մեր երկրում կան մարդիկ, որոնք հանդես են եկել նախաձեռնությամբ և առաջարկել են իրենց ընկերությունների հաշվին նախակրթարաններին նվիրել գույք: Շատ կարևոր է, երբ մարդիկ ձեռք են մեկնում համայնքին և ուզում են իրենց մասնակցությունն ունենալ այս գործընթացում: 2-րդ փուլի համար արդեն այսօր աշխատանքներ են տարվում գույքի, նաև որոշակի վերանորոգման նպատակով: Ինչ վերաբերում է 3-րդ փուլին, ապա այդ ժամանակ կունենանք ամբողջովին պատրաստի խմբասենյակներ»:

Ի՞նչ միջոցներով է իրականացվելու ծրագիրը

«Նոր խմբերի ձևավորման ծախսերը, բնականաբար, ներառված են Երևանի 2019թ. բյուջեում: Դա այն սահմանված գումարն է, որ տրամադրվում է նախակրթարաններին ամեն երեխայի համար: Ինչ վերաբերում է վերանորոգման ծախսերին. նշեմ, որ վարչական շրջաններն ու նախակրթարաններն իրենց բյուջեներում ունեն այն գումարը, որով կարողանան ըստ անհրաժեշտության այդ աշխատանքներն իրականացնել: Բայց, եթե ծրագրի 3-րդ փուլի համար ծագեն այլ խնդիրներ, ապա, գիտեք, որ փետրվարին ունենալու ենք բյուջեի լրամշակում, և այդ փուլում ևս հնարավորություն կունենանք ներառելու այդ ծախսերը բյուջեում:

Ծրագրի արդյունքների մասին

Կա քաղաքապետի հստակ հանձնարարական. տարիների ընթացքում կարողանալ հասնել խնդրի վերջնական լուծման, որովհետև ցանկացած ընտանիքում, որն ունի նախակրթարանի տարիքի երեխա, սա մի շարք խնդիրներ է լուծում: Մենք գիտենք բազում երիտասարդ ընտանիքներ, որոնք ունեն փոխկապակցված խնդիր և, քանի որ երեխան չի գնում նախակրթարան, ընտանիքի անդամներից մեկը ստիպված է լինում չաշխատել: Մեր նախաձեռնած գործընթացը կօգնի լուծել այս և մի շարք այլ խնդիրներ:
Նոր խմբերի բացմանը զուգահեռ՝ տարվա ընթացքում փորձելու ենք տարածքներ գտնել մանկապարտեզներում, որպեսզի 2020 թվականին խնդիրը որոշակիորեն մոտեցնենք լուծմանը:
Նախակրթարաններում հերթագրման թափանցիկության մասին

«Մինչև տարեվերջ կվերագործարկենք mankapartez.yerevan.am կայքը, որը լրամշակված տարբերակով հնարավորություն կտա ծնողներին անձամբ հետևելու հերթագրման ընդհանուր շարժին: Սա արվել է մեր համաքաղաքացիների համար գործընթացն առավելագույն չափով թափանցիկ դարձնելու նպատակով»:

Հետագա ծրագրերի մասին

«Նախակրթարանները գտնվում են ուշադրության կենտրոնում: Ցավոք, մեր նախակրթարանների շենքային պայմանները բարվոք չեն, տարիների ընթացքում ոչ նպատակին են օգտագործվել, և մի շարք նախակրթարաններ ուղղակի սոսկալի վիճակում են, դրանք հիմնանորոգելու համար բավական մեծ բյուջե է պահանջվում: Հանձնարարել ենք վարչական շրջանների ղեկավարներին գույքագրել և ուսումնասիրել նախակրթարանները. ի՞նչ շենքային պայմաններ են և ի՞նչ խնդիրներ կան, որից հետո կհասկանանք, թե որքա՞ն գումար է անհրաժեշտ խնդրի վերջնական լուծման համար:

Պետք է նշեմ, որ տարիների ընթացքում չլուծված խնդիրը ոչ մի կերպ չի կարելի կապել Երևանի բյուջեում փող չլինելու հետ, որովեհտև բյուջեն գրեթե նույն է, ինչ եղել է տարիներ շարունակ: Խնդիրը լուծելը զուտ կամքի և առաջնահերթության հարց է: Այսօրվա քաղաքային իշխանությունը, վստահեցնում եմ, այս խնդիրը լուծելու կամք ունի: Մենք գիտակցում ենք, որ, այո, նախակրթարանների 8 հազար հերթագրվածները քաղաքային իշխանության համար առաջնայիններից մեկն է՝ առաջնահերթությամբ չզիջելով մայրաքաղաքում առկա մի շարք այլ խնդիրների:

Հնարավոր այլ միջոցների ներգրավմամբ մանկապարտեզների խնդիրները լուծելու մասին

«Մենք փորձում ենք մեխանիզմներ մշակել ոչ միայն մանկապարտեզների, այլև հանրակրթական հաստատությունների համար: Պետք է մոտեցումները փոխվեն, պետք է ընտրվեն մարդիկ, որոնք լուրջ վերահսկողություն են իրականացնում դրամական շարժերին, որպեսզի դրանք օգտագործվեն ըստ առաջնահերթության և ըստ անհրաժեշտության: Երբ որոշակիորեն հասկանանք մոտցումները, կկարողանք խնդրին վերջնական լուծում տալ, իսկ ցանկացած նվիրատու բաց և թափանցիկ կերպով կկարողանա տեսնել թե ու՞ր է գնում իր նվիրատվությունը և արդյո՞ք իր գումարը նպատային է ծախսվել, թե՞ ոչ»:

Տոն օրերի առիթով հնարավոր դրամահավաքության դեպքերի մասին

«Մի շարք վարչական շրջաններում արդեն իսկ եղել են խորհրդակցություներ՝ վարչական շրջանների ղեկավարների, հանրակրթության վարչության պետի, վարչական շրջանում ոլորտի պատասխանատուների և նախակրթարանների ներկայացուցիչների մասնակցությամբ: Հստակ հանձնարարվել է աշխատել նոր մոտեցումներին համահունչ: Առաջնային հարցերից մեկը առնչվել է դրամահավաքության դեպքերին: Ի դեպ, այսօր էլ ստանում ենք մի շարք ահազանգեր, որ որոշ նախակրթարաններում իներցիայի ուժը դեռ չի սպառել իրեն: Այն նախակրթարանները, որոնցում կբացահայտվեն նման դեպքեր, ուզում եմ վստահեցնել, որ խնդիրը կլուծվի իրավական դաշտում: Վերջերս մի քանի շրջայցեր ունեցանք նախակրթարններում, որոնք, ինչպես տեսել եք, եղել են հետևանքային: Մենք պետք է կարողանանք այս ընթացքում վարչական շրջանների համապատասխան բաժնի կարևորությունը մեծացնել: Ցավոք, տարիների ընթացքում անմիջական ղեկավարի նշանակությունը հավասարեցվել է զրոյի և հարաբերությունները եղել են նախակրթարանի տնօրեն-ամենաբարձր պաշտոնյա մակարդակով: Կարևորելով անմիջական ղեկավարի գործոնը՝ փորձելու ենք բարձրացնել և բարելավել աշխատանքային որակը: Առավել քան վստահ եմ, որ նոր առաջարկված խաղի կանոներն ընդունելի են բոլորի համար, որովհետև այդ կանոններում չկան ծանոթներ, բարեկամներ, հարևաններ և այստեղ շահում են այն մարդիկ, որոնք աշխատում են օրենքի շրջանակում»: Այս մասին տեղեկացնում են Երեւանի քաղաքապետարանից:

ԼՐԱՀՈՍ ԼՐԱՀՈՍ

Scan News-ը՝ նոր կայքով՝ նոր ձևավորմամբ
23:59 31 Դեկ 2018
Դիտումներ 789
ՀՐԱՏԱՊ ԼՈՒՐ

Այսօր դեկտեմբերի 31-ն է
09:00 31 Դեկ 2018
Դիտումներ 813
ՀՐԱՏԱՊ ԼՈՒՐ
Այսօր դեկտեմբերի 30-ն է
09:00 30 Դեկ 2018
Դիտումներ 826
ՀՐԱՏԱՊ ԼՈՒՐ
Մրայա Քերի․ Հերոս
15:00 29 Դեկ 2018
Դիտումներ 1500
Այսօր դեկտեմբերի 29-ն է
08:00 29 Դեկ 2018
Դիտումներ 844
ՀՐԱՏԱՊ ԼՈՒՐ
Օրվա մամուլի ընտրանի. դեկտեմբերի 28
19:15 28 Դեկ 2018
Դիտումներ 984
ՀՐԱՏԱՊ ԼՈՒՐ
Ճանապարհները Հայաստանում
08:45 28 Դեկ 2018
Դիտումներ 1038
ՀՐԱՏԱՊ ԼՈՒՐ
Այսօր դեկտեմբերի 28-ն է
08:00 28 Դեկ 2018
Դիտումներ 802
ՀՐԱՏԱՊ ԼՈՒՐ