Ունքն ուղղելու փոխարեն՝ աչքը չհանենք. Արկադի Խաչատրյան

Քաղաքական 19.01.2021   13:44   45

Ֆինանսավարկային և բյուջետային հարցերի մշտական հանձնաժողովի նախագահ Արկադի Խաչատրյանը, ելույթ ունենալով «Տնտեսական մրցակցության պաշտպանության մասին» օրենքում փոփոխություն կատարելու մասին նախագծի վերաբերյալ, նկատեց, որ մրցակցության ազատությունը կարևոր է շուկայական տնտեսություններում գնագոյացման և բիզնեսի արդար մրցակցության համար:

Պատգամավորի խոսքով, այդ խնդիրները լուծելու համար Տնտեսական մրցակցության պաշտպանության պետական հանձնաժողովը պետք է ակտիվ լինի և ունենա համապատասխան լիազորություններ, քանի որ ցանկացած պետության համար  շուկայի մոնոպոլիզացիան չարիք է:

Արկադի Խաչատրյանը, անդրադառնալով օրենքի նախագծով ներդրված նոր լիազորությանը՝ օպերատիվ հետախուղական տվյալների հայթայթման մեխանիզմին, կարևորեց դրա իրավակիրառ պրատիկան  և կարծիք հայտնեց, որ օրենքով պետք է հստակ նշվեն այն դեպքերը երբ կթուլատրվի դիմել այդ միջոցին:

Պատգամավորը շեշտեց, որ ներդրվող գործիքով թույլատրվում է նաև գաղտնալսումներ  իրականացնել և կոչ արեց զգույշ լինել, քանի որ գործ ունեն ազատ տնտեսական գործունեության սահմանադրական իրավունքի հետ:

«Պետք է, որ այդ գործիքները կիրառվեն միայն գերիշխող դիրք ունեցող սուբյեկտների չարաշահման դեպքերը կանխելու համար»,- շեշտեց պատգամավորը և առաջարկեց օրենքով ամրագրել դրա կիրառման հստակ դեպքերը, օրինակ՝ երբ արձանագրված կլինի շուկայում գերիշղող դիրքի առկայության և դրա չարաշահումը կանխելու հիմքեր:

Նրա խոսքով, եթե գործիքը կիրառվի համատարած բոլոր տնտեսվարողների դեմ, ապա այն  վատ ազդակ կլինի բիզնես միջավայրի համար, քանի որ ոչ գերիշխող դիրք ունեցող գործարարներն անընդհատ կմտածեն, որ իրենց գաղտնալսում են :

«Դա կարևոր հարց է, որպեսզի ունքն ուղղելու փոխարեն՝ աչքը չհանենք և որևէ կերպ բիզնես միջավայրի վրա բացասական ազդեցություն չունենաք, իսկ իրականացվող միջոցառումները լինեն համաչափ»,- եզրակացրեց Խաչատրյանը:


 Պիտակներ
         Արկադի Խաչատրյան


 Նմանատիպ նյութեր

 Մեկնաբանություններ 0
Copyright © 2018 ScanNEWS. Design created by Fon uWeb