Ուենդի Մորթընն առաջին անգամ կայցելի Հայաստան

Իրադարձային 16.02.2021   10:49   52

Մեծ Բրիտանիայի և Հյուսիսային Իռլանդիայի Միացյալ Թագավորության արտաքին գործերի, համագործակցության և զարգացման նախարարության Եվրոպական հարևանության և Ամերիկայի հարցերով նախարար Ուենդի Մորթընը փետրվարի 16-ին առաջին անգամ կայցելի Հայաստան: Նա կլինի Երևանում և Վանաձորում:

 Հայաստանում Մեծ Բրիտանիայի դեսպանությունը հայտնում է, որ իր երկօրյա այցի ընթացքում նախարար Մորթընը ՀՀ արտաքին գործերի նախարարի տեղակալ Ավետ Ադոնցի հետ պաշտոնապես կբացի Բրիտանական դեսպանության նոր գրասենյակը Երևանում՝ ի նշան Միացյալ Թագավորության և Հայաստանի ժողովուրդների միջև ամրապնդվող կապերի։

Նախարարը նաև կողջունի Միացյալ Թագավորության, ՅՈՒՆԻՍԵՖ-ի և ՄԱԿ-ի Զարգացման ծրագրի միջև նոր համագործակցությունը, որի միջոցով խթանվում է Վայոց ձորի, Գեղարքունիքի և Սյունիքի մարզերի՝ կորոնավիրուսային վարակի (COVID-19) և հակամարտության հետևանքով տուժած խոցելի համայնքների տնտեսական և սոցիալական կայունությունը։ Միացյալ Թագավորությունն ակնկալում է, որ այս համագործակցությունը հնարավորություն կընձեռի ուղիներ գտնել այդ համայնքներում երկարաժամկետ կայունություն ապահովելու համար:

«Միացյալ Թագավորությունը հանձնառու է Հայաստանի հետ տևական բարեկամությանը: Ես անհամբերությամբ սպասում եմ ՀՀ արտաքին գործերի նախարար Արա Այվազյանի և ՀՀ նախագահ Արմեն Սարգսյանի հետ հանդիպումներին՝ քննարկելու մեր երկրների միջև ավելի սերտ կապեր ստեղծելու և գլոբալ մարտահրավերների, ներառյալ՝ կլիմայի փոփոխության և COVID-19-ի դեմ պայքարի ուղղությամբ միասին աշխատելու բազմաթիվ հնարավորությունները: Միացյալ Թագավորությունը պատրաստ է աջակցել COVID-19-ի և հակամարտության հետևանքներից Հայաստանի «կանաչ» վերականգնմանը։ Մենք ողջունում ենք ջերմոցային գազերի արտանետումների կրճատման ուղղությամբ Հայաստանի ստանձնած հավակնոտ պարտավորությունները և ակնկալում օգնել Հայաստանին իրացնել իր ներուժը՝ որպես կլիմայի փոփոխության դեմ պայքարի առաջատար՝ Կլիմայի փոփոխության մասին շրջանակային կոնվենցիայի կողմերի 26-րդ համաժողովին (COP26) ընդառաջ»,-այցին ընդառաջ ասել է ՄԹ արտաքին գործերի, համագործակցության և զարգացման նախարարության Եվրոպական հարևանության և Ամերիկայի հարցերով նախարար Ուենդի Մորթընը:

Միացյալ Թագավորությունն ուրախ է, որ աջակցություն է ցուցաբերել վերջին տարիներին ժողովրդավարական և տնտեսական բարեփոխումների ոլորտում և կոռուպցիայի դեմ պայքարում Հայաստանի տպավորիչ առաջընթացին: Այցի ընթացքում նախարար Մորթընը կքննարկի, թե երկրներն ինչպես կարող են համագործակցել՝ խթանելու հետագա առաջընթացը, այդ թվում՝ օգնելով փոքր բիզնեսի զարգացմանը և աջակցելով Հայաստանի Ազգային ժողովին՝ որպես ավելի ժամանակակից և թափանցիկ կառույց կայացման ճանապարհին:

Նախարար Մորթընը հանդիպում կունենա Արտաքին գործերի նախարար Այվազյանի հետ և կվերահաստատի Միացյալ Թագավորության աջակցությունը ԵԱՀԿ Մինսկի խմբի համանախագահների աշխատանքներին` Լեռնային Ղարաբաղում իրական և տևական խաղաղության հաստատման ուղղությամբ: Հայաստանը հնարավորություն ունի ամուր և տևական խաղաղություն հաստատելու Կովկասյան տարածաշրջանում` նաև խաղաղության հաստատմանն ուղղված նախաձեռնություններում կանանց ներգրավվածության մեծացման միջոցով:

Քաղաքականության մեջ և գործարար աշխարհում կանանց մասնակցության ամրապնդումը կենսական նշանակություն ունի Հայաստանի զարգացման և բարգավաճման համար: Նախարարը կայցելի Վանաձորի տեխնոլոգիական կենտրոն՝ հանդիպելու  բիզնեսի ու նորարարության մեջ ներգրավված կանանց և կին ձեռներեցների հետ, որոնց Միացյալ Թագավորությունն աջակցել է իր «Լավ կառավարման հիմնադրամի» միջոցով:


 Պիտակներ



 Նմանատիպ նյութեր

 Մեկնաբանություններ 0
Copyright © 2018 ScanNEWS. Design created by Fon uWeb