ԵԽ պատգամավորները կոչ են անում Ղարաբաղում անհապաղ դադարեցնել ռազմական գործողությունները

Իրադարձային 30.10.2020   13:42   48

Եվրախորհրդարանի պատգամավորները կոչ են անում անհապաղ եւ անվերապահ կերպով դադարեցնել ռազմական գործողությունները ղարաբաղյան հակամարտության գոտում` հետագա անդառնալի մարդասիրական աղետից խուսափելու համար:

Համատեղ հայտարարության մեջ Եվրախորհրդարանի արտաքին հարաբերությունների հանձնաժողովի նախագահ Դեւիդ Մաքալիսթերը (ԵԺԿ), Եվրախորհրդարանի` Հայաստանի հարցով մշտական ​​զեկուցող Անդրեյ Կովաչովը (ԵԺԿ) եւ Եվրախորհրդարանի` Ադրբեջանի հարցով մշտական ​​զեկուցող Ժելյանա Զովկոն (ԵԺԿ) խստորեն դատապարտել են շարունակվող ռազմական գործողությունները:

«Հայաստանի եւ Ադրբեջանի արտգործնախարարների` Ժնեւում կայանալիք հանդիպման նախաշեմին մենք խստորեն դատապարտում ենք երկու երկրների միջեւ ընթացող ռազմական գործողությունները` հրադադարի ռեժիմի երեք համաձայնագրերի խախտմամբ, որոնք կնքվել են 2020 թվականի հոկտեմբերի 10-ին, 17-ին եւ 25-ին միջազգային հանրության շարունակական ջանքերի շրջանակներում:

Միջազգային հանրության դերը պետք է կայանա խաղաղության որոնման եւ պատերազմող երկրների միջեւ բանակցություններին աջակցման մեջ: Ռազմական բախումներն արդեն իսկ քաղաքացիական ահռելի եւ անիմաստ զոհերի եւ տառապանքների են հանգեցրել: Մենք ցավակցություն ենք հայտնում եւ կարեկցում ենք բոլոր նրանց, ովքեր կորցրել են իրենց սիրելիներին եւ ստիպված են վախով ապրել իրենց կյանքի համար: Մենք կոչ ենք անում անհապաղ եւ անվերապահ կերպով դադարեցնել ռազմական գործողությունները` հետագա անդառնալի մարդասիրական աղետից խուսափելու համար:

Քաղաքացիական բնակչության կյանքի պաշտպանությունը պատերազմող երկու կողմերի պարտականությունն է, որը բխում է միջազգային իրավունքից: Պետք է երաշխավորվի մարդասիրական առաքելությունների ազատ եւ անարգել մուտքը հակամարտության գոտի` կարիքավոր մարդկանց օգնություն տրամադրելու համար:

Մենք նաեւ կոչ ենք անում հրադադարի պահպանման վերահսկման արդյունավետ միջազգային մեխանիզմ ներդնել: Մենք Հայաստանին եւ Ադրբեջանին կոչ ենք անում շուտափույթ վերսկսել առարկայական բանակցությունները` Մինսկի խմբի համանախագահների հովանու ներքո եւ համաձայնեցված հիմնական սկզբունքների հիման վրա:

Մենք տարածաշրջանային բոլոր մասնակիցներին կոչ ենք անում աջակցել բանակցություններին երկու կողմերի կողմից ընդունված այս ձեւաչափի շրջանակներում եւ հրատապ եւ անհրաժեշտ քայլեր ձեռնարկել` տեւական խաղաղության հասնելու համար»:


 Պիտակներ
         ԵԽ


 Նմանատիպ նյութեր

 Մեկնաբանություններ 0
Copyright © 2018 ScanNEWS. Design created by Fon uWeb